Öryggispúðinn

Barn, sem er lægra en 150 sm á hæð, má ekki vera farþegi í framsæti bifreiðar sem búin er uppblásanlegum öryggispúða fyrir framan sætið (skv. 71. gr. umferðarlaga).
Beinagrind yngri barna er ekki nógu sterkbyggð til að geta tekið við því höggi sem myndast þegar öryggispúðinn blæs upp. Þess misskilnings hefur gætt að börn geti kafnað í öryggispúðanum. Þetta er ekki rétt þar sem öryggispúðinn tæmist á nokkrum sekúndum. Hættan, sem börnum stafar af öryggispúðanum, felst í högginu sem hann veitir en ekki í köfnun.
 

Bílbeltið Mikilvægt er að beltið liggi rétt, nálægt hálsi, yfir bringubeinið og niður yfir lærin (ekki yfir magann). Því nær líkamanum sem beltið er þeim mun meira er öryggið. Börn eiga ekki að hafa báðar hendur yfir skábandinu því þá er hætta á alvarlegum meiðslum á kviði. Það sama á við ef beltið er haft of langt úti á öxlinni því að þá getur líkaminn kastast yfir efra bandið og neðri hluti beltisins þrýstist inn í kviðinn. Rannsóknir sýna að ekki er hættara við meiðslum þótt bandið sé haft nálægt hálsi.